29.02.2008

Երեկ ուշ երեկոյան ապօրինի հանրահավաքի մասնակիցները բռնել են Ազգային անվտանգության ծառայության երկու աշխատակիցների, որոնց ներկայացրել են իբրև «սադրիչներ», հետագայում ազատելով նրանց:

ՀՀ ԱԱԾ, կատարելով օրենքով վերապահված սահմանադրական կարգի պահպանման և ժողովրդի անվտանգության ապահովման գործունեությունը, հայտարարում է, որ Ազգային անվտանգության ծառայության աշխատակիցների ջանքերի շնորհիվ է վերջին օրերին ապօրինի հանրահավաքի ծայրահեղական տրամադրված մասնակիցների մոտից առգրավվել մեծ քանակությամբ զենք-զինամթերք, թունավոր և պայթուցիկ նյութեր, որի վերաբերյալ ԱԱԾ Քննչական վարչությունը 6 անձանց հանդեպ հարուցել է քրեական գործ՝ ՀՀ ՔՈ 300 հոդվածի հատկանիշներով: Դա փաստում է այն մասին, որ ՀՀ ԱԱԾ գործում է միայն ի նպաստ ժողովրդի, ընդ որում ապահովում է հանրահավաքի մասնակիցների անվտանգությունը:

Եվս մեկ անգամ հավաստիացնում ենք, որ Ազգային անվտանգության ծառայությունը Ոստիկանության հետ համատեղ, շարունակելու է կատարել իրենց վրա օրենքով դրված պարտականությունները և զգուշացնում է որոշ «տաք գլուխների», որ ծառայողական գործունեությունը խոչընդոտելու յուրաքանչյուր փորձ կբերի օրենքով նախատեսված խստագույն պատասխանատվության:

ՀՀ ԱԱԾ Մամուլի կենտրոն